Mineralet dhe energjia rikthejnë eksportet në rritje, tekstilet mbeten pika më e dobët

Eksportet u rritën me 13.6% në qershor, të mbështetura nga mineralet, energjia dhe industria e rëndë, ndërsa fasoneria vijon të humbasë terren.

Pas një periudhe të gjatë me tkurrje, tregtia e jashtme shqiptare shënoi një kthesë pozitive në qershor 2026. Sipas të dhënave, eksportet u rritën me 13.6% krahasuar me të njëjtin muaj të një viti më parë, ndërsa importet u zgjeruan me 9.1%. Megjithatë, rritja nuk ishte e shpërndarë në mënyrë të barabartë mes sektorëve, pasi vetëm disa grupe mallrash mbështetën zgjerimin e eksporteve, ndërsa sektorët tradicionalë vijuan të përballen me vështirësi.

Gjatë muajit qershor, Shqipëria eksportoi mallra me vlerë 35.4 miliardë lekë dhe importoi 83.5 miliardë lekë. Si rezultat, deficiti tregtar arriti në rreth 48 miliardë lekë. Edhe pse eksportet u rritën me ritëm më të shpejtë se importet, hendeku mes tyre mbetet i lartë, duke treguar se ekonomia shqiptare vazhdon të mbështetet në një masë të madhe te mallrat e importuara.

Mineralet dhe energjia udhëheqin rritjen e eksporteve

Zhvillimi më i rëndësishëm i muajit ishte rikthimi i mineraleve, lëndëve djegëse dhe energjisë elektrike si motori kryesor i eksporteve. Ky grup kontribuoi me 5.7 pikë përqindje në rritjen vjetore të eksporteve, duke dhënë ndikimin më të madh pozitiv ndër të gjitha kategoritë e mallrave.

Në vendin e dytë u renditën materialet e ndërtimit dhe metalet, të cilat shtuan 3.6 pikë përqindje, duke reflektuar kërkesën më të lartë në tregjet partnere për produkte industriale dhe materiale bazë. Një kontribut të rëndësishëm dha edhe grupi i makinerive, pajisjeve dhe pjesëve të këmbimit, me 3.3 pikë përqindje, ndërsa ushqimet, pijet dhe duhani kontribuan me 1.6 pikë përqindje.

Tekstilet vijojnë të humbasin terren

Në kahun tjetër, tekstilet dhe këpucët mbetën grupi me ndikimin më të madh negativ në eksportet shqiptare. Ky sektor uli rritjen e përgjithshme të eksporteve me 1.1 pikë përqindje, duke konfirmuar vështirësitë që po përjeton industria fason.

Edhe prodhimet e drurit dhe letrës, si dhe lëkura dhe artikujt prej saj, dhanë kontribute negative prej nga 0.2 pikë përqindje secili. Sipas të dhënave, fasoneria vazhdon të ndikohet nga rritja e kostove të prodhimit, mungesa e fuqisë punëtore dhe konkurrenca nga vendet me paga më të ulëta, ndërsa sektorët e mineraleve, energjisë dhe industrisë së rëndë po fitojnë një rol gjithnjë e më të madh në strukturën e eksporteve.

Energjia dhe mallrat bazë dominojnë edhe importet

Edhe në importe, grupi me ndikimin më të madh ishte ai i mineraleve, lëndëve djegëse dhe energjisë elektrike, me një kontribut prej 2.3 pikë përqindje në rritjen vjetore. Ushqimet, pijet dhe duhani, së bashku me produktet kimike dhe plastike, kontribuan secili me nga 2.2 pikë përqindje, duke treguar se ekonomia shqiptare mbetet e varur nga importi i energjisë, lëndëve të para dhe mallrave të konsumit.

Nga ana tjetër, materialet e ndërtimit dhe metalet shënuan kontribut negativ prej 0.2 pikë përqindje në importe, ndërsa lëkura dhe artikujt prej saj ndikuan me -0.1 pikë përqindje.

Italia mbetet partneri kryesor tregtar

Italia vijon të jetë partneri më i madh tregtar i Shqipërisë. Eksportet drejt saj u rritën me 7.6%, ndërsa importet nga Italia u zgjeruan me 24.9%. Rritje të fortë të eksporteve shënoi edhe Kosova, me 38.5%, ndërsa importet nga Kina u rritën me 11.5%.

Në të kundërt, eksportet drejt Gjermanisë dhe Maqedonisë së Veriut ranë përkatësisht me 12.8% dhe 13%, ndërsa importet nga Turqia dhe Spanja shënuan tkurrje. Të dhënat tregojnë gjithashtu se 58.4% e tregtisë së jashtme të Shqipërisë zhvillohet me vendet e Bashkimit Evropian, ndërsa afro 70% e eksporteve kanë si destinacion tregun evropian, duke konfirmuar rolin dominues të BE-së në marrëdhëniet tregtare të vendit.

Burimi: Ekofin.al

Më të lexuarat